అమె వనిత

బ్రహ్మ తన అంశను పంచి ఆడపిల్లగా మలిచాడు
అతని వంతు సృష్టి చేస్తుంది ఆమె వనితగా రూపు దిద్దుకుని

పూవులలోని సుకుమారత్వాన్ని ఆపాదించుకుని
ఇంద్రధనుస్సు రంగులలోని సౌందర్యాన్ని ఆణువణువూ అద్దుకుని
ధరణి తల్లి నుంచి వారసత్వంగా సహనాన్ని అందుకుని
అవతరించింది అమె వనితగా రూపు దిద్దుకుని

బాల్యంలో తల్లితండ్రుల చాటు పిల్లగా పెరుగుతూ
యవ్వనంలో పెళ్లి అన్న బంధంతో ముడివేసుకుని
తనవారిని పరాయి చేసుకుంటూ భర్త వెంట నడచి
అతనిగా మారిపోతుంది అమె వనితగా రూపు దిద్దుకుని

తాను అమ్మగా మారి తన పిల్లలకు జన్మ నిస్తుంది
వారి ఆలనలో పాలనలో అన్నీ మరిచి జీవిస్తుంది
ఆపద సమయంలో తనో ఆలంబనగా మారి
ఇంటిని కాపాడుకుంటుంది ఆమె వనితగా రూపుదిద్దుకుని

కత్తి పట్టిన వీరనారీమణుల గాధల్లోనూ చిరస్మరణీయం అమె
కలం చేతబూని కావ్య రచనలు చేసిన అక్షర సుమాలలోను అమె
ప్రజారాజ్య పరిపాలనలోను సాటిలేని మేటి అమె
అబలని అలుసు మాని గుర్తించు ఆమెని
పూర్ణత్వాన్ని నింపుకున్న వనితగా ...
బహు రూపాల రూపసి అమె వనిత ...!!

Like