చెల్లి ..

దూరమయిన అమ్మా నాన్నల
తలపుల్ని మదిలో దాచుకొని...
ఎదలో నిన్ను పొదువు కుంటాను చెల్లి..!

అన్ననై నీ అడుగు తడబడ నీయక
నా అరచేతుల నీ పాదాల ఉంచి
ఎప్పుడూ వాడనిపచ్చికనై అమరుతాను తల్లీ..!

మాటల గాలం వేసే మాయా లోకంలో
మనం ఒకరికొకరం...తోడయినాము
అనాధలం కాము మనం..ఆవేదన వద్దు చెల్లీ..!

ఆకలయినా..ఆరాటమయినా..
కలిసి పంచుకునే...పేగు భందం మనది..
పెద్దలిచ్చిన ఆస్తి ..ప్రేమానురాగాల ఈ పొదరిల్లె తల్లీ..!

చందమామ నడిగితే..ఇవ్వలేను గానీ
అమావాస్య ఎరుగని వెన్నెల నుంచుతా
నిన్నే ఓ జాబిల్లిగా మలచి చల్లగా చూస్తా చెల్లీ..!!