*****పావురమా **************

చిన్నారుల కేరింతలలోని స్వచ్చతని..
అరువు తీసుకున్నవా..పావురమా...
చా చా నెహ్రు గారి వెన్నెలకురిపించే చూపుల
కొలనులో మునకలేసావా పావురమా..
అందుకే నీ ఆగమనం ప్రతి మనసుకు
శాంతిని ప్రసాదిస్తుంది కదూ పావురమా..!.

కల్మషం ఎరుగక నీవు గగనంలో విహరిస్తూ ఉంటే..
వెన్న ముద్దలు కృష్ణునికై.. వెతుకుతున్నాయా..?
ఆ దరి..ఈ దరి...రెక్కలల్లారుస్తూ...
కువకువల చప్పుళ్ళతో నల్లనయ్యను పిలుస్తున్నాయా.?.
ఎన్ని ప్రశ్నలు మా మదిని తొలుస్తున్నాయో,, పావురమా..!

స్వార్ధ రాక్షసుని విషపు కోరలు మనిషిని చంపి..
మానవత్వపు పేగులను మెడను వేసుకు తిరుగుతుంటే..
రెక్కలు విప్పని పసిగాయలు 'ఆడపిల్ల ' అని..
కన్ను తెరవకనే..కడుపులోనే.. కడతేరి పోతుంటే..
ఆవేదనల అగ్నిగుండం గుండెలో నింపుకొని ..
కొడుకు పుట్టాలనే అహంకారంతో..కాపురం చేస్తూ..
అమ్మగా చచ్చి..ఆలిగా నిలిచే ఆడదాని ఆత్మ ఘోషను
విశ్వం అంతా తిరుగుతూ చాటి చెపుతావా పావురమా..
ఆది ..అంతం .. 'ఆమె 'లోనే ఉందని తెలుపుతావా పావురమా..!