* మరుల పూలు *

ఎదను కోస్తున్నవి
ఎదురు చూపులు

గుబులు పుట్టిస్తున్నవి
గజిబిజిగా ఆలోచనలు

తహ తహ లాడుతున్నవి
తాళిని మోస్తున్న పసుపుతాడు ముచ్చట్లు

విడివడుతున్న కురులనుండి రాలుతున్నవి
పందిట్లో పోసుకున్న తలంబ్రాలు

కదపలేని అడుగులతో చిత్రం అయినాయి
మెరుస్తున్న మెట్టెల పారాణి పట్టీల పాదాలు

సిగను చేరలేదని చిన్నబోతున్నవి
విరిసినా మురిపానికి నోచుకోని మల్లెలు

తెల్లచీర పచ్చగాజుల కలలు కంటున్నవి
పొద్దున్న పోయి ఇంకా రాని మామకోసమా కనులు

మేమే సాక్ష్యం అంటున్నవి
ఇత్తడి చెంబులో నిండుగా ఉన్న నీళ్లు

విరహపు కవ్వింతల ఆరడి చేస్తున్నవి
మౌనపు ఊసులలో తడిసిన మంచు మరులపూలు !